အကြောင်းအရာ တစ်ခုရလိုက်တိုင်း စာရီးတတ်တေ အကျင့်စော် အငယ်ချေကနီ စွဲဗျာယ်ကျင့်သားရနီပါရေ ... အဂုလေ့ အေပိုင်ပါဗျာယ် ... ရီးရဖို့လား စဉ်းစားပနာ ရီးစော်အားသန်ခါ ရီးဖို့ဘက်ကို ဆုံးဖြတ်ချက်များလားပါရေ ...
အေတစ်ခေါက် အကြောင်းက ကောင်းသက်တမ်းမရင့်ခရေ အလုပ်တစ်ခုအကြောင်းပါလေ ... သက်တမ်းမရင့်ခဆိုစော်က ယင်းအလုပ်မှာ သင်းချို သက်တမ်းမရင့်ခစော်ပါ ....
Albert David လို့ ခေါ်ရေ Medical Company (India) တစ်ခု ရန်ကုန်မှာရုံးခွဲဖွင့်ထားပါရေ ... Country Manager က အိန္ဒိယက ကုလားပါ ... Promoter ၊ Marketing ၊ Medical Rep တိအားလုံး မြန်မာတိပါ ... သင်းချို ယင်း company ကို အလုပ်လားလျှောက်ပါရေ ... လားခါ လျှောက်လွှာလားတင်စော်ပါရာ ... Mr. Viveck နန့် တွိပနာ တစ်ခါတည်း interview ပါရေ ... သူနန့် သင်းချိုနန့် စကားတိ အများကြီးပြောဖြစ်ပနာ ချက်ချင်းခန့်ပြီးကေ သင်းချိုကို မန္တလေးကို လွှတ်ပါရေ ... Admin and Accounts post နန့်ပါ ... မလားခင် ရန်ကုန်ရုံးမှာ ၂ ပတ်ထားပါရေ ...
အလုပ်ခန့်လို့ နောက်တစ်ရက် ရုံးစတက်ရရေနိန့်မှာပင် အစည်းအဝေးရှိပါရေ ... အစည်းအဝေး တစ်ဘက် ခုံဝိုင်းထိပ်မှာ သူထိုင်ပနာ ... နောက်တစ်ဘက် ခုံဝိုင်းထိပ်မှာ သင်းချို ထိုင်ပါရေ ... ကျန်ရေလူတိက ယင်းခုံကို ဝိုင်းလို့ထိုင်ပါရေ ... အစည်းအဝေးမှာ သူက သူလိုချင်ရေ ပုံစံ၊ ရောင်းအား တိကို ပြောခရေ ... အားလုံး ခေါင်းငုံ့ပနာ ထိုင်နီကတ်တေ ... ပြီးကေ တစ်ယောက်တစ်လှည့် ထွက်ပနာ white board မှာ ဇယားကွက်မှာ ဖြည့်ကတ်တေ ... ဖြည့်ပြီးတိုင်း Mr. Viveck ကဆဲရေ ... အားလုံးက တစ်ခွန်းတည်းစီရာ ပြန်ပြောကတ်ပါရေ ... "Try more, sir" ပါလတ် ... ပြန်ပြောပြီးကေလေ့ အကြာကြီးရပ်နီရသိပါရေ ... သူရို့ အစည်းအဝေးကို သင်းချိုနားမလည် ... သူရို့တိကို အလုပ်ကိုမလုပ်ချင် ဖေ့သာကျကေ လိုချင်ရေ ... အကျင့်မကောင်း ... ဆိုရေစကားတိအတွက် ပြုံးစိစိနန့် ခံနိုင်ရေ အင်အားတိကို သင်းချို အံ့သြခပါရေ ...
အစည်းအဝေးစော် မိုးထ ၈နာရီ ခွဲက စစော် ညစာ ၄ နာရီခါ မှပြီးပါရေ ... ပြီးမှ ထမင်းလားစားကတ်ပါရေ ... Medical Rep တိက စာကျက်နီကတ်ပါရေ ... ရန်ကုန်ရုံးမှာ Admin လုပ်နီစော်က သင်းချိုနန့် ရွယ်တူ ဆရာဝန်မချေ ... သူက အဆဲမခံရ ... သူပြောပြမှ သိရစော်က အားလုံးအဆဲခံရယင်းသားနန့် မျက်နှာ မပျက်စော်က Mr. Viveck ပြောစော်ကို နားမလည်ကတ်လို့လတ် ... Try more ဆိုစော်က အေထက်ကြိုးစားပါမယ်လို့ ပြောစော်ပါလတ် ... သြော် အဂုမှ နားလည်ခပါရေ .... သင်းချိုစိတ်မကောင်းဖြစ်မိပါရေ ... သူရို့တိက နားမလည်လို့ ငြိမ်ခံနိုင်ကေလေ့ ယင်း Mr. Viveck စော် သူရို့တိကို ဆဲကောင်းတိုင်းဆဲနိန်ပါရေလေ ... ပြီးကေ လစာထုတ်စော်လေ့ စာမေးပွဲစစ်စော်ကျနိန်စော်ပါဗျာယ် တစ်ယောက်ချင်းစီဝင်ခရေ အချိန်တစ်စိချေလောက်ကြာမှ ပြန်ထွက်လာကတ်တေ ... ယင်းပိုင်နန့် သင်းချိုသိလိုက်စော်က ယင်းကုလားစော် မြန်မာလူမျိုးတိကို ကောင်းကောင်းအထင်သေးရေ ဆိုစော်ပါဗျာယ် ... ယကေလေ့ နားမလည်ရေ ကောင်မချေတိက တိန်းခံနိုင်ကေလေ့ နားလည်ခရေ ရခိုင်သားချေတစ်ယောက်က ကုလားနန့် ဖောင်းပနာ ထွက်ခရေလို့သိရပါရေ ...
ယင်းပိုင်နန့် သင်းချိုမန္တလေးကို လားခပါရေ ... သင်းချိုအတွက် နိန်ဖို့ အဆောင်စရိတ် ... စားဖို့သောက်ဖို့နန့် လမ်းခရီးစရိတ်က အစ စီစဉ်ပီးပါရေ ... ယင်းပိုင်နန့် သင်းချိုမန္တလေးမှာ နိန်သားကျနိန်ပါဗျာယ် ... တစ်လမှာ Mr. Viveck စော် မန္တလေးကို ဆင်းလာပါရေ ... သူစော် မန္တလေးကို ရောက်လို့ နောက်တစ်ရက်နိန်ခါ သင်းချိုနန့် အတူလုပ်တေ အစ်ကို နန့် သင်းချိုကို ခေါ်ပါရေ ... ပြီးကေ တစ်ယောက်ကို တစ်လှည့်စီ ရင်းရင်းနှီးနှီး မနိန်ဖို့ ခေါ်ပြောပါရေ ... ကုလားဇာတိပြပါဗျာယ်လေ ... ယကေလေ့ သင်းချိုရို့စော် သူနန့် သူမပြန်ခင်တစ်ရက် Dinner ရှိရေ နိန့်အထိ အဆင်ပြေအောင်နိန်ကတ်ပါရေ ... ယကေလေ့ ယင်း Dinner စော် သင်းချိုထွက်စာတင်လို့ ပျက်လားခရပါရေ ... အကြောင်းအရာက သင်းချိုက သူနန့် ဟိုအစ်ကို နှစ်ယောက်ပဋိပက္ခမှာ ကြားညှပ်လားလို့ပါ ... ဇာပိုင်လေ ဆိုကေ သူက ဟိုအစ်ကိုကို ရှမ်းပြည်ကို ခရီးထွက်ခိုင်းပါရေ ... ယင်းခရီးစော် လမ်းစရိတ်သက်သက် ၃သိန်းကုန်ပါဖို့ ... နေ့စရိတ်တိမပါသိပါ ... ယင်းချင့်ကို ဖြန့်ဖြူးရေး company က တွက်ပြလိုက်စော်က ရောင်းအားမှာ ၃ % ပါ ... ဇာလို့ဆိုကေ ဖြန့်ဖြူးရေး ဆိုစော်က ထုတ်လုပ်တေ company တိအများကြီးဆီးတိကို တာဝန်ယူပနာ လားရောင်းပီးစော်ဆိုခါ ရောင်းအားက သိန်း ၁၀၀ ကျော်ပါရေလေ ... Albert David အနေနန့်ရာ ဆိုကေ ရောင်းအားက သိန်း ၃၀ ကျော်လောက်ရာရှိပါရေလေ ... ယင်းပိုင်ဆိုကေ လမ်းစရိတ်စော် ၁၀% ဖြစ်လီပါဖို့ဗျာယ် ... ယင်းချင့်ကို Distribution Side ကလေ့ သေချာပြောလိုက်ပါရေ ... ယင်းပြောခါက သင်းချိုနန့် Mr. Viveck ရာရှိရေ အတွက် သူက သင်းချိုခေါင်းကို ပုတ်ပနာတောင်မှတ်ထားလို့ပြောပါရေ ... ပြီးကေ သူမှတ်ထားစော်က ၃% တစ်ခုတည်းပါ ... ထိုအစ်ကိုနန့် သူနန့် ယင်းကိစ္စကို ရှင်းခါ သူက သင်းချိုကို သူ့ဘက်က သက်သေလုပ်ခိုင်းရေ ... သင်းချိုကလေ့ သူရို့ရောင်းအားနန့် ဖြစ်လို့ ၃% ဖြစ်စော်ကို ရှင်းပြခါ သင်းချိုကို ဒေါသထွက်ခပါရေ ... ထိုအစ်ကိုကို ဟိုဘက်ခုံကို လွှတ်ပနာ သင်းချိုကို ပြောပါရေ ဇာကြောင့် လိမ်လေဆိုပနာ ... သင်းချိုက မလိမ်ကြောင်းကို ပြောကေလေ့ မရ ... မပြောဘဲထိုင်နိန်ကေလေ့ ဇာလို့မပြောလဲ နင်ငါ့ဖေ့သာကို အလကားလိုချင်နိန်ရေမနား လို့ပြောခါ သင်းချိုက မခံဘဲနန့် နင်က ၃% ရာနားလည်ဖို့နန်းရာ နင်က မပီးချင် ... အမှန်ကိုတွက်ပြစော် ... ခရီးက ရှုံးဖို့ပိုင်တွိကေ မထွက်ခိုင်းကဲ့လို့ပြောကေလေ့ ၃% လို့ဂျီးဗျာယ်ပြောနိန်ပါရေ ... နင်ဇာလို့လိမ်လေ ဂျီးဗျာယ်မိန်းနိန်ပါရေ ... ဖေ့သာကို လိုချင်နိန်ရေ ဂျီးဗျာယ်ပြောပါရေ ... သင်းချိုလေ့ သည်းခံနိုင်စော်ကုန်ခဗျာယ်... ယင်းလမှာ သူလာဖို့ဆိုပနာ လစာကို မလွှဲဘဲထားစော် ၁၄ရက်ရှိနိန်ပါဗျာယ် ... ဟိုလက Expenses တိလေ့ သင်းချိုရို့ကိုပီးဖို့ အကြွီးကျန်နိန်သိပါရေ ... သင်းချိုလေ့ စိတ်တိုလာပါဗျာယ် .. အေလောက်ပြောစော် ငါနင့်အောက်မှာ မလုပ်နိုင် ငါထွက်ဖို့လို့ပြောလိုက်ပါရေ ... သူက သင်းချိုကို ဖေ့သာကိုအလကားလိုချင်ရေလို့ထပ်ပြောပါရေ ... သင်းချိုလေ့ ငါက ငါ့လုပ်အားကို လိုချင်စော် နင်က ငါရို့လစာကို ခုထိမပီး Expenses တိလေ့ မပီး ငါရို့ဖေ့သာနန့် စီးပွါးလုပ်ထားလာလို့ မိန်းလိုက်ပါရေ ... သူလေ့ ရှက်ခပါရေ ထင်ပါရေ ... နင်ထွက်ချင်ကေ ၃ လစာပီးလို့ပြောပါရေ ... သင်းချိုက ငါ့ပါးက တောင်းမနိန်ကဲ့ အားလုံးင့ါလစာနန့် Expenses တိပြန်ပီး ဆိုပနာ စာရင်းလုပ်ပနာ ပီးလိုက်ပါရေ ... သူက ၃ လစာထပ်တောင်းပါရေ ... သင်းချိုက နင်ဖြုတ်ပလိုက်တေလူတိကို ၃လစာပီးလိုက်စော် တစ်ယောက်ရှိကေ ငါ့ကို ပြ ၊ ယကေ ငါပီးဖို့ ... မဟုတ်ကေ နင့်ကို တရားစွဲဖို့လို့ပြောလိုက်ပါရေ ... ပြီးစော်နန့် ယင်းနေရာမှာပင် ထွက်စာရီးပါရေ ... ဟိုအစ်ကိုကိုခေါ်ပနာ သက်သေလက်မှတ်ထိုးခိုင်းခါ ယင်းအစ်ကို အံ့သြခပါရေ ... ပျော်ဖို့ကောင်းစော်က သူလေ့ တစ်နိန့်တည်းမှာ အလုပ်ထွက်စာရီးပါရေ ... ပြီးကေ နှစ်ယောက် ပျော်ပျော်ပါးပါး အလုပ်ထွက်ကတ်ပါရေ ... ယင်းကုလားက လစာအပြည့်မပီးပါ ... ပြီးကေ သင်းချိုရို့လက်ထဲမှာ ရှိရေ ဆီးတိကို တောင်းပါရေ ... သင်းချိုက အကြွီးနန့် သိမ်းပလိုက်ဗျာယ်လို့ ပြန်ပြောလိုက်ပါရေ ... ယင်းခါမှ ဖေ့သာပီးမယ် ဆီးပြန်ပီးလို့တောင်းပါရေ ... သူ့ဆီးကို အလကားပီးပလိုက်လတ်မယ် ကြောက်လို့ပါ ... သင်းချိုလေ့ ဖေ့သာလေ့ မယူ ဆီးလေ့မပီး နင့်ကိုလေ့ မမြင်ချင်လို့ ပြောလိုက်ပါရေ ... သင်းချိုရို့ ဆီးတိကို လူတိကို လိုက်ပီးလိုက်ကတ်ပါရေ ...
သူက အထင်သေးစော် အကျင့်ပါခစော်စော် ရန်ကုန်ရုံးမှာ သူပြောစော်ကို နားမလည်ကတ်လို့ ပြုံးခံနိုင်ရေ လူတိအတွက်နန့်ပါမနား ... သူရို့က ပြုံးခံနိုင်စော်ကို သူက လက်ခံရေ ယူဆခလို့ပါလေ ... နောက်မှ ပြန်သိရစော်က သူက အကျွန့်သူငယ်ချင်းကို "she is very proud of herself." လို့ပြောပြီးကေ အကျွန့်ကို မှတ်ချက်ချက်ပါရေလတ် ....


သင်းချို

အိမ်ပြန်ခွင့်

ခန်းနားထည်ဝါမှုတိအောက်က မြို့ပြ .......
နွီးထွီးမှုကို တောင့်တနီရေ မျက်ဝန်းတစ်စုံ .........
အငွေ့အသက် ကင်းမဲ့ရေ ထမင်းတစ်လောင်ပန်း .......

မျှော်လင့်ချက်ကို အရည်ဖျော်မိရေ ကြဲပြန့်နီရေ

အိပ်ပျက်ညတိ .......

ရည်ရွယ်ချက်ဆိုရေ
ဆန္ဒတစ်ခုနောက်ကို လိုက်ယင်းလိုက်ယင်း ........
ဘ၀ဆိုရေ
ပြသ၁နာထဲကို တိုးဝင်ပြီးယင်း တိုးဝင်ယင်း ........

ဟိုက ဒေက ရင်ဟောင်းလောင်းပေါက်နန့် လူတိ
ငါ့ကို ၀င်တိုက်လားခရေ ........

ငါ့ပတ်ဝန်းကျင်မှာက သီဆုံးနီရေ မျက်လုံးတိရာမနား .....
တစ်ချက်လောက် နောက်လှည့်ကြည့်မိခါမှ
အဆုံးအစ မရှိရေ ဟင်းလင်းပြင် .......

အမိယေ
ငါ့အတွက် အိပ်တန်းပြန်ချိန်က ဇာခါလေ ..........


သင်းချို

မေမေ့ကျောင်းလွယ်အိတ်


၁၉၉၁ခုနှစ် အ-မ-က (၁၅) ၊ ပြည်တော်သာရပ်ကွက်ကို သင်းချို ၁ တန်း ကျောင်းသားသစ်အဖြစ် ပြောင်းလာရရေအတွက် ရင်တိခုန်နီရေ ။ ညစာက မေမေဝယ်ခရေ အင်္ကျီအသစ်ချေနန့် ကျောင်းကိုဝင်လာရေ ခြီလှမ်းတိကို အကြည့်တစ်ချို့က ဆွံ့အ စီရေ ။ စူးစမ်းရေမျက်လုံးဝိုင်းချေတိနောက်က သရော်ရေအဓိပါယ် တိနန့်တတူ ဝရုန်းသုန်းကားလိုက်လာရေ
"သူတော်မ ဆန်ခံလာရေ ။ ကန်တော့ပါယင့်" ဆိုရေအသံတစ်ခုနန့် အားလုံးဝိုင်းရယ်ကတ်တေ ။ ကိုယ့်ကိုပြောမှန်းသိကေလေ့ ဇာကြောင့်ပြောမှန်း နားမလည်မိ ။ သင်းချိူနန့် အင်္ကျီဆင်တူဝတ်ထားရေ မျက်လုံးချေတစ်စုံက ငေးကြည့်နီရေ ။ သင်းချိုကတော့ အားလုံးကို ငေးကြည့်နီမိယင့် ။

သင်းချိုနောက်ကို တစ်ယောက်လာရပ်ပနာ "သူတော်မဆန်ခံရေအိတ်နန့် ဇာလုပ်နီလေ" ဆိုပြီးကေ လွယ်အိတ်ကို ဆွဲချွတ်လားရေ ။ သိလိုက်ပါဗျာယ် သူရို့အတွက် ထူးဆန်းနီရေ သင်းချိုလွယ်အိတ်က မျက်စိကျစရာ ဖြစ်လားရရေ ဆိုစော်ကို ။
သင်းချိုလွယ်အိတ်က ရပ်ကွက်မှာလာရောင်းရေ ပိတ်အထူသားကို မေမေ လက်နန့်ခြုပ်ပီးထားစော် ။ လွယ်အိတ်အောက်ဘက်ထောင့်နေရာမှာ လူများတိပိုင် အမွီးချေတိမပါ ။ အေအတိုင်း ပိတ်အပြားချေ နှစ်ပြားနန့်ပါ ။
ငိုချင်ချင်မျက်နှာနန့် ပြုတ်ကျလားရေလွယ်အိတ်ကို အကောက်မှာ အင်္ကျီဆင်တူချေ အနားကိုရောက်လာပနာ ကောက်ပီးရေ ။ သူ့ကိုအားကိုးတကြီး ကြည့်မိရေထင်ယင့် ။ သူလေ့ ၁ တန်းကျောင်းသူ ပါ ။ ခင်လပြည့်ဆွေ ။ သူငယ်ချင်း တစ်ယောက်ရလိုက်ပါဗျာယ် ။ ယော် အခန်းထဲကို သင်းချိုကို သရော်ရေ သူရို့ရာဝင်လာဗျာယ် ။ အတန်းတတူတူလတ် ။
"ဒေသူရို့နန့်က တတူမသင်ချင်" ..... ဒေစကားကို စိတ်ထဲကရာပြောဝံ့ရေ ။ သူရို့ကကျောင်းရှင်တိမနား ။

နိန့်ခင်းမုန့်စားကျောင်းဆင်းခါ ရီချိုးဖို့ အိမ်ပြန်ကေလေ့ အအော်ခံရလို့ မေမေကို ပူဆာဖြစ်တေ ။ အမွီးချေနန့် လွယ်အိတ်တစ်အိတ် ။ မေမေ ခံစားချက်ကို သင်းချိုနားမလည်တတ် ။ မေမေက ရင်ခွင်မှာထည့်ပနာ သနပ်ခါးလိမ်းပီးယင်းနန့် ပြောပါရေ ။ "ချစ်လို့ကိုယ်တိုင်ခြုပ်ပီးထားစော်" ပါလတ် ။ သင်းချိုကတော့ခါ ချစ်စော်ထက် အမွီးချေနန့် လွယ်အိတ်ချေရာ လိုချင်ရေ ။

အခြေနေဆိုစော်ကို သင်းချိုနားမလည်တတ်ခ ။ သင်းချိုမှာ အစ်ကိုကြီး ၊ အစ်ကို လင်းလင်း(မွီးစပ်အစ်ကို) နန့် ညီမချေ ရှိပါရေ ။ အစ်ကို ၂ယောက်က ၄တန်း ၊ ညီမချေက ကျောင်းမတက်ရသိ ။ ပါပါက အစိုးရဝန်ထမ်းချေ ၊ သင်းချိုမေမေက မှီခို ။ အဘိုးရှင်နန့် ၊ အရီးရှင် (အပျိုကြီး)လေ့ရှိရေ ။ သင်းချိုရို့က ဝန်ထမ်းအိမ်ရာမှာ နိန်စော်ပါ ။ ပါပါလစာကို မသိခ ။ အိမ်မှာ ဘူးပင်၊ ခဝဲပင် ဇာကြောင့်စိုက်လေ မစဉ်းစားတတ်ခပါ ။ ဝင်ငွေ၊ထွက်ငွေ သင်းချိုနားမလည်။

ယင်းပိုင်နန့် လူတိက သရော်လိုက် ၊ သင်းချိုက လွယ်အိတ်တောင်းလိုက် ငိုလိုက် ၊ မေမေက ချော့လိုက် ခြောက်လိုက် နန့် စာသင်နှစ် ၁ နှစ်ကုန်ဆုံးလားပါရေ ။

* * *
၁၉၉၂ ခုနှစ် .........
ဒေနှစ်ခါ ကျောင်းတက်ဖို့အတွက် ပျော်ဖို့စော် နန့် ဝမ်းနည်းမှု ဒွန်တွဲနီပါရေ ........ အမွီးနှစ်ဘက်ပါရေ လွယ်အိတ်ချေအသစ်(သင်းချိုအတွက်အသစ် ၊ မနှစ်က ကိုကြီးလွယ်ပြီးသားပါ ၊ သူ့မှာ စာအုပ်များလာလို့ လွယ်အိတ်အကြီး ဝယ်ရရေ) လွယ်ရလို့ကျေနပ်ကေလေ့ ၊ သင်းချိုကို ပေါင်းရေ ၁ဦးတည်းသော ကောင်းအားကိုးမိရေသူငယ်ချင်း စစ်တွေကနီ ပြောင်းလားခပါဗျာယ် ။ အထီးကျန်စော်ကို မသိတတ်ခင်ကပင် ရင်ဆိုင်လိုက်ရပါရေ ......

ဒေနှစ်မှာတော့ သူငယ်ချင်း အသစ် ၂ယောက်၊ ၃ယောက် ရလာပါဗျာယ် ။ လွယ်အိတ်မှာ အမွီးပါလို့ လို့ထင်ပါယင့် ။

တရွီရွီနန့် ကျောင်းတက်လို့ ၃လလောက်အကြာ သက်တမ်းရင့်လွယ်အိတ်က မိုးရီထဲမှာ ဗြန်းခနန်း ခြုပ်ရိုးစုတ်လားရေ ။ လူတိ(သူငယ်ချင်း)ဝိုင်းရေကတ်ကေလေ့ ဝမ်းမနည်း ။ သင်းချိုမှာ သူရို့မမြင်နိုင်ရေ ပျော်စရာစိတ်ကူး ရှိရေလေ ။ လွယ်အိတ်အသစ်ရဖို့ဗျာယ်ဆိုရေစိတ်ကူးနန့် မျက်နှာမှာထိန်းမနိုင်၊သိမ်းမရ အပြုံးတိနန့် စာအုပ်တိကိုကုန်းကောက်ပနာ အိမ်ကိုပြီးပါလတ်တေ ။ အိမ်ကိုရောက်ကေ မေမေက ချစ်လို့ပြန်ခြုပ်ပီးရေ ။ .......... အေပိုင်နန့် လွယ်အိတ်စုတ်လိုက် ၊ သင်းချိုပျော်လိုက် ၊ မေမေက ချစ်လိုက် ....... လိုက် .... လိုက် ......။

ကိုကြီးနန့် ကိုလင်းလင်း လွယ်အိတ်ပြောင်းဖို့ အချိန်က သင်းချို အိမ်မက် ...... သိနီကေလေ့ လွယ်အိတ်စုတ်တိုင်း သင်းချိုပျော်မိခပါရေ ......

* * *

၁၉၉၃ ........ ............. ..............
၉၄ ........... ..............
၅ ........ ၆ ....................၂၀၀၉ ...........

* * *

၂၀၁၀ ခုနှစ် ............
လူနီမှုအဆင့်မြင့်ရေ မြို့မှာ သင်းချို ၁ယောက်တည်း ကျောင်းတက်ယင်း၊ အလုပ်လုပ်ယင်း လူရာဝင်ဖို့ ကြိုးစားနီရရေ ။ ဟိုက ၊ ဒေကလူတိ ဝင်တိုက်လားရေ ။ ကကွေ့ကကောက် တစ်ချို့ ၊ ဖဖြောင့်တစ်ချို့၊ မှန်းဆမရရေတစ်ချို့ ......

နင်းတက်လားကတ်တေ ၊ လက်ချင်းချိတ်ကတ်တေ ၊ တိုက်မိလို့ အားနာပြုံး ပြုံးပြလားကတ်တေ ...........

သင်းချိုတစ်ယောက် တံဆိပ်အမျိုးမျိုးအိတ်တိကို လွယ်ပနာ ရင်ဘတ်တိအီးစက်နီရေ ..... ဆွဲဆောင်မှုအားကောင်းရေ ရောင်စုံအိတ်တိက သံယောဇာဉ်ကင်းရေပင်က ...... ကြိုးတိပြတ်လားကေပင် ပြန်ပျင်လို့မရဗျာယ် .....
သူရို့ကိုလွယ်ရလို့ ပြတ်လားကေ အသစ်ဆိုစော် တကူးတက မျှော်လင့်စရာ မလိုရေအတွက် ရင်ခုန်ဗျာယ် ပျော်နီစရာတိလေ့ အလိုလိုပျောက်လားရေ ......

လူတန်းစိဖို့ကြိုးစားဗျာယ် ပြီးလိုက်နီရရေ သင်းချိုလေ အညောင်းမိလို့ အီးစက်နီရေ နှလုံးသားကိုဆုပ်ကိုင်မိကေ သံယောဇာဉ်ကြိုးအထပ်ထပ်နန့်ခြုပ်ပီးထားရေ ၊ မရိုးနိုင်ရေ မျှော်လင့်ချက်တိနန့် ပြည့်နီရေ မေမေ့ကျောင်းလွယ်အိတ်ချေတိကို ကောင်းအောက်မိပါရေ ..........................




PS (သူတော်မ ဆန်ခံလို့ ခေါ်ဖူးခရေသူတိက အဂုသင်းချိုအခင်ဆုံးသူငယ်ချင်းတိဖြစ်နီပါဗျာယ်)



သင်းချို(Twinkle Ice)