ခန်းမထဲကို တစ်လှမ်းချင်း လှမ်းဝင်လာခရေ ။ ကြီးကျယ်ခမ်းနားရေ အပြင်အဆင်အားလုံးက တစ်ခါသီဆုံးလားရေ ငါ့ဘဝအတွက် ဈာပနာပိုင် ။ လှပခန့်ငြားရေ ခုံမြင့်ထက်က အနီရောင် ကတ္တီပါပိတ်ကားထက်မှာ ကပ်ထားရေ ရွှေရောင် ဖေါင်းကြွစာလုံးတိကို မမှိတ်မသုန် စိုက်ကြည့်နိန်ခရေ ။ လက်ထဲမှာ ကိုင်ထားခရေ စက္ကူအိတ်ချေထဲမှာ တစ်ချိန်က နှစ်ယောက်သား တတူရီးခဖူးစွာကို ကိုယ်တိုင် ဒီဇိုင်းဆွဲပနာ print ထုတ်ထားခရေ ငါရို့နှစ်ယောက်နန့်ရာ သက်ဆိုင်ခရေ ပွဲမဝင် ဖိတ်စာချေ ။ ငါ ဇာလောက်ထိ ရူးသွပ်ခဖူးလေ ... ဇာလောက်ထိ ပျော်ဝင်ခဖူးလေ ... အချစ်ဆိုရေ ရီကြောထဲမှာ ဇာလောက်ထိ မိန့်မြောစီးပါလားဖူးခလေ ...
ငါ့လက်ထဲကို ရောက်လာခရေ ဖိတ်စာချေစွာ ငါ့ကို လာစီချင်ရေဖြစ်ဖြစ်၊ မလာစီချင်ခရေပင် ဖြစ်ဖြစ် ... အေပွဲကို တက်ဖို့အတွက် တရားဝင် အခွင့်အလမ်းတစ်ခုရာလေ ။ ယင်းဖိတ်စာချေအတွက် ကျေးဇူးတင်ပါရေ ။ ကောင်းမျက်နှာပြောင်တိုက်တေလို့ပင် သတ်မှတ်ကတ်ပတ်စီ ဂရုမစိုက်ဗျာယ် ။ အေပွဲချေစွာ မင်းမျက်နှာကို လလွတ်လလပ် ငေးမောကြည့်ဖို့ နောက်ဆုံး အခွင့်အရေးရာ ။ အေပွဲပြီးစွာနန့် ငါရေ ငါ့လွမ်းဆွတ်မှုတိကိုတောင် ဘောင်ခတ်ထားလိုက်ရဖို့ဗျာယ်လေ ။ အခွင့်မရှိရေ လမ်းကို လျှောက်ချင်နိန်ကေတောင် လူ့ကျင့်ဝတ်အရ ငါ့ကိုယ်ကျင့်တရားကို ငါစောင့်ထိန်းရဖို့ဗျာယ်မလား ။ လူသိစရာ မလိုပါဘူး ။ အေပွဲကို တက်လာခရေငါ့ကို မင်းအသိုင်းဝိုင်းတိက မကောင်းဆိုးဝါးတစ်ကောင်ကိုပိုင် ကြည့်နိန်ကတ်ဖို့မှန်းလေ့ ငါသိရေ ။ ငါ့ကို သိုးမည်းတစ်ကောင်ပိုင် ထင်မှတ်ထားကတ်ဖို့မှန်းလေ့ သိရေ ။ ယကေလေ့ ငါ့အတွက် သူရို့ပြောရေ ထင်မှတ်တေအရာတိထက် နောက်ဆုံး အခွင့်အရေးအနေနန့် ငါ့ရင်ဖတ်ထဲမှာ တစ်ဘဝလုံးစာ စွဲစွဲထင်ထင် မှတ်မိလားစီဖို့ မင်းအပြုံးချေတိကို ကြည့်လိုက်ရဖို့ မြင်လိုက်ရဖို့ အရာလောက် အရေးကြီးစွာ တခြားမရှိ ...
မင်းသိဖို့လား ... ဖိတ်စာချေ ရောက်လာရေနိန့်ကပင် အဂုထိ ဖွင့်မကြည့်ဖြစ်သိစွာကို ။ မင်းနန့်ပက်သက်တေအကြောင်းအရာတိကို သိနိန်တတ်တေငါ ဖိတ်စာကို မဖွင့်ဖတ်ဘဲ အေပွဲကို ရောက်လာခရေ ။ ဇာအချိန် ဇာနိန်ရာ သိနိန်ပြီးသား လူတစ်ယောက်အတွက် ဖိတ်စာကို ဖွင့်ဖတ်စရာ မလိုဆိုစွာ မထူးဆန်းလောက်ထင်ယင့် ။ ဖိတ်စာကို ရစွာခါကပင် နိန့်တိုင်း အချိန်တိုင်း လုပ်နိန် ကျင့်နိန်ခစွာ တစ်ခုရာ ရှိရေ ။ ငါ့ရင်ထဲက နာကြင်မှုတိ မထင်ဟပ်စီဘဲ ပြုံးတတ်ဖို့ ။ လွန်ခရေ ၃ ပတ်လောက်ကပင် ပြုံးတတ်ဖို့ နိန့်တိုင်း အချိန်တိုင်း ငါ ကြိုးစားနိန်ခရေ ။ ယင်းချင့်စွာပင် မင်းအတွက် ငါ့နောက်ဆုံးလက်ဆောင် ။ နာကြင်မှုမထင်ဟပ်တေ ငါ့အပြုံးချေနန့် မင်းကို လွတ်မြောက်ခွင့် ပီးသင့်ရေမနား ။ မင်းစိတ်ထဲမှာ တဖဲ့ချေတောင် နောက်ဆံမငင်စီချင်ဝေ ။ မင်းပျော်နိန် ကြည်နူးနိန်စီချင်ရေ ။ မင်းစွာ လောကကြီးထဲမှာ နွီးထွီးရေ မိသားစုဘဝနန့် ပျော်နိန်ရေဆိုစွာကို သိနိန်ရကေပင် ငါအမှန် ကျေနပ်နိန်လီဖို့ ။
မင်းသိထားရေအတိုင်း ငါ့ကို မာနကြီးရေလူလို့ရာ တစ်သက်လုံး စွဲမှတ်ထားလိုက်ပါ ။ မဟုတ်.... အေနိန့်ကပင် ငါ့ကို ခေါင်းထဲတောင် ယောင်ပနာ မရောက်စီကဲ့ဖိလေ ။ မင်းကို မပင်ပန်းစီချင် ။ ငါက ငါ့မာနနန့် အရာအားလုံးကို ရင်ဆိုင်နိုင်ရေလူတစ်ယောက်အဖြစ် မင်းယုံကြည်အောင်ထိ ဖန်တီးယူခဗျာယ် မလား ။ ငါ့ကို မထားခပါကဲ့ဆိုရေစကားစွာ ငါ့ရင်ဘတ်ထဲမှာ ဗလောင်ဆူ ပဲ့တင်ထပ်နိန်ခကေလေ့ မင်းခြီလှမ်းချေတစ်ခုကို ချည်နှောင်မိလတ်မယ်လို့ ငါ မြိုချထားခပြီးဗျာယ်လေ ။ ဆောက်တည်ရာမရ ဖြစ်နိန်ဖို့ မင်းပုံစံချေကို ကြည့်ဝံ့ရေသတ္တိမဟိခရေ ငါ့ပျော့ညံ့မှုတိအတွက် အေစွာ ငါရလာရေ ဆုလာဘ် ။ ငါ့ရင်ဘတ်ထဲက ချစ်ခြင်းတိကို အေအချိန်ထိရာ ငါဖက်တွယ်ခွင့် ရဖို့ဗျာယ်ထင်ယင့်လေ ။
တောက်လွင်နိန်ရေဝတ်စုံတိနန့် လူတိကြားထဲက ခန်းမဒေါင့်ဖက်ချေမှာ ငါထိုင်နိန်ခပါရေ ။ ခန်းမထဲကို လှမ်းဝင်လာခရေ မင်းရို့ကို ပြောနိန်ကတ်တေ ချီးမွမ်းထောပနာစကားတိလေ့ ငါ့နားထဲမှာဝင်နိန်ရေထင်ယင့် ။ မကြားတစ်ချက် ကြားတစ်ချက် ။ မင်းမျက်နှာကိုရာ ငါ မမက်မမော ကြည့်နိန်မိရေ ။ မင်းလေ အဂေါင့်ပင် ကောင်းကြည့်ကောင်းနိန်ယင့် ။ ယကေလေ့ မင်းဆံပင်ချေကို အေပိုင် Gel တိအများကြီးနန့် ထောင်ထားခဖို့အစား Gel ကို ကောင်းမသုံးခဘဲရာ နောက်ကိုလှန်ဖြီးထားခဖို့ဆိုကေ မင်းနန့် ပိုလို့လိုက်တေလေ ။ ပြီးကေ မင်းနက်ကတိုင် အပြားအကြီးနန့် အစား အပြားချေ အငယ်နန့် ခဲရောင်ချေစွာ မင်းနန့် အလိုက်ဆုံးဗျာယ် ။ အင်း မင်းမျက်နှာချေကတော့ကေ ငါမြတ်နိုးရေ အပြုံးချေနန့် ။ မင်းအပြုံးမှာ တစ်ခုခုပါနိန်လား ။ မင်းအပြုံးမှာ ညိုးရော်မှုချေ မြူတစ်မှုန်စာတောင် မဟိစီချင်လေ ။ ငါ့အမြင်မှားမှုသက်သက်ရာ ဖြစ်ပါစီ ။ မင်းကို တစ်ခုချင်းစီ အသေးစိတ်လိုက်မှတ်နိန်ခရေ ငါ့အတွက် မင်းဘယ်ဘက်လောက်မောင်းကို ချိတ်တွယ်ထားရေ သေးသွယ်ပျော့ပျောင်းရေ လက်ချောင်းချေတိကို အကြည့်ရောက်လားရေ ။ မင်းလက်မောင်းကို ချိတ်ဆွဲထားရေ ယင်းလက်ချောင်းချေတိက စိုးပိုင်မှုရှိလိုက်တယ်ပင်ကဝေ ။ ငါ့မျက်ရည်တိ မျက်လုံးအိမ်ထက်ကို တက်မလာနိုင်အောင်ထိ ငါအောင့်ထားလိုက်တေ ။ ယင်းလက်ချောင်းချေတိပိုင်ရှင်ကို ရည်ရွယ်ချက်မပါဘဲ ကြည့်လိုက်မိခရေ ။ ကြည်စင်နိန်ရေ မျက်နှာချေနန့် ချိုသာရေ အပြုံးပိုင်ရှင်သူက မင်းကို ဘဝတစ်လျှောက် ကြည်နူးစီဖို့ သေချာပါရေ ။ ခုံအောက်မှာချထားခရေ ငါ့လက်ချောင်းတိနန့် မာနဝတ်ရုံခြုံထားရေ ငါ့နှလုံးသား ငလျင်လှုပ်နိန်ကတ်တေ ။
မင်းလှမ်းလာခရေ ခြီလှမ်းအချက်တိုင်းကို ငါ မမြတ်နနိုးနန့် လိုက်မှတ်နိန်ခရေ ။ ငါ့ဘဝကို နင်းဖြတ်လားခကေတောင် မင်းဘဝအီးငြိမ်းရာကို လျှောက်လှမ်းလားရေ ခြီလှမ်းရာ ဖြစ်ပါစီ ။ မင်းနန့် နီးလာလီ ငါ့ရင်တိ နာကြင်လာလီ ... မဖြစ် ငါငိုလို့မဖြစ် ။ ငါ့နာကြင်မှုအခိုးအငွေ့တိ ငါ့မျက်လုံးကို အငွေ့ပျံ လျှံကျလာလို့ မဖြစ် ။ မင်းအတွက် ငါ့နောက်ဆုံးလက်ဆောင်ချေစွာ တန်ဖိုးလျော့လားလို့ လုံးဝမဖြစ် ။ ငါ့ကိုမြင်လိုက်တေ မင်းမျက်လုံးကို ငါချက်ချင်းဖတ်မိလိုက်တယ် ။ မင်းရင်ဘတ်ထဲမှာ ပင့်သက်ချေ တစ်ချက်တောင် မရှိုက်မိပါစီကဲ့ဝေ ။ ငါ့အတွက် မင်းပုံရိပ်တိကို တစ်သက်စာ မှတ်တမ်းတင်ချင်ရေ ဆန္ဒ ၊ မင်းကို နောက်ဆုံးပီးလိုက်ခချင်ရေ ငါ့လက်ဆောင်ချေတိအတွက် အရာအားလုံးကို ရင်ဆိုင်လို့ အရောက်လာခရေငါ့ကို နောင်တမရ ရစီကဲ့ဝေ ။ အခြားလူတိထင်မြင်ချက်တိ စွပ်စွဲချက်တိကို ငါအန်တုနိုင်ကေလေ့ မင်းမျက်ဝန်းကအရိပ်ချေ ငါ့ကို ပြိုလဲမလားစီပါကဲ့ ။ ငါတောင်းပန်ပါရေ ငါမြတ်နိုးတန်ဖိုးထားရေ စစ်မှန်ရေမင်းအပြုံးချေတိကို တစ်သက်စာ အမှတ်တရယူလားခွင့်ကို ငါ့ကိုပီးပါ ။
မင်းရို့နှစ်ယောက် ငါ့ဘက်ကို လှမ်းလာခရေ ။ မင်းအတွက် လက်ဆောင်ချေကို ငါပီးလိုက်တေ ။ ငါ မင်းရို့နှစ်ယောက်စလုံးကို ဂုဏ်ပြုရေ အပြုံးစစ်တစ်ခု မင်းရို့တစ်သက်လုံးအတွက် ငါပီးခရေ ။ ငါ့အရိပ်ချေတစ်ချက်၊ အသံချေတစ်ခု အပြောင်းအလဲကို သေချာဖတ်တတ်နိန်ရေ မင်း လုံးဝ မဖမ်းမိနိုင်လောက်အောင်ထိ ငါ့အပြုံးသေသပ်လွန်းမှန်း ငါယုံကြည်နိန်ရေ ။ ငါ့ကို မိတ်ဆက်ပီးရေ မင်းစကားသံ " သူ့နာမည်က XXXX ... စာတိရီးရေ ... သူ့အထူးခြားဆုံးက မာနကြီးရေ ..သူ့မာနထက် တစ်ခုကိုလေ့ မလိုအပ်တေ လူလေ .. " ။ ငါအမှန် ပစပွင့်ပနာ တစ်ချက်ရယ်လိုက်မိရေ .. ငါ့လက်ဆောင်က တန်ဖိုးရှိလားဗျာယ် ။ မင်းကိုငါပီးချင်ရေအတိုင်း လက်ခံယူလားခရေအတွက် မင်းနန့်တတူ အရာအားလုံးကို ကျေးဇူးတင်ပါရေ ။ ငါ့လက်ကို သမီးရှင်ကို ဆန့်ပီးလိုက်တေ " ကွန်ဂရက် ကျူလေးရှင်း " ။ သမီးရှင်က ပြုံးပနာ လက်ချေကို ဆန့်ပီးခရေ ။ အိုး နွီးထွီးလိုက်တေ လက်ချေ ။ ကောင်းနူးညံ့မှုမဟိရေ ငါ့လက် မတုန်နိန်အောင် ငါ အသက်အောင့်ထားလိုက်တေ ။ ပြီးကေ မင်းရို့ကို နှုတ်ဆက်ပြီးနာ ငါပြန်လှည့်လာခရေ ။
အဝင်ခါ ငါပီးခရေလက်ဖွဲ့ထုပ်ချေကို မမချေတိက သိမ်းနိန်ကတ်တေမြင်လိုက်ယင့် ။ ငါ့လက်ဆောင်ချေကို မင်းရို့နှစ်ယောက်လုံး နှစ်သက်နိုင်ပါစီ ။ မင်းနန့် နှစ်ယောက်တတူ ဖိတ်စာချေကို အပျော်ရီးဖြစ်ခရေနိန့်ကပင် ငါထိုးထားခရေ ခေါင်းအုံးစွပ်ချေ နှစ်စွပ်နန့် ဆင်တူစွယ်တာချေ နှစ်ထည် ... ယင်းချင့်ထက် တန်ဖိုးထားပနာ ပီးလိုက်စွာက ငါ့နှလုံးသားတစ်ခုလုံး ... ခန်းမအပြင်ကို ရောက်ခါမှ တာရီကျိုးကျခရေ ပါးထက်ကမြစ်နှစ်စင်း ... ငါ့ခြီထောက်မှာ လာကျခရေ ရီတစ်စက် ....
သင်းချို
Labels: ESSAY
Subscribe to:
Post Comments (Atom)
0 comments:
Post a Comment