သက်တန့်ရောင် မှတ်စုချေတိ

စာရီးခြင်းစွာ သင်းချိုအတွက် နှလုံးသားလမ်းကြောင်း ဖွင့်ရေနိန်ရာ၊ စိတ်ထွက်ပေါက်ပီးရေနိန်ရာ၊ ဆန္ဒတိကို တချက်ချေ ချွေးသိပ်ပီးရေနိန်ရာ။ ခေါင်းစဉ်တစ်ခုအောက်မှာ အေဘောင်ထဲက မထွက်ဘဲ စာရီးပီးပါဆိုကေ သင်းချို သုညရာရဖို့အသေချာ။ စာရီးဖို့ စည်း၊ ဘောင် အတားမဟိရေ သင်းချို စာရီးမကောင်းပါ။ သင်းချို စာကို ဆန္ဒနန့်ရီးရေ၊ အိပ်မက်နန့်ရီးရေ၊ နှလုံးသား ကို သွီးလို့ရီးရေ။ သင်းချို စာကို ဆန္ဒနန့်ဖတ်တေ၊ ရင်ဘတ်နန့်ဖတ်တေ၊ နှလုံးသားတန်းခါးကို ဖွင့်လို့ဖတ်တေ။ တခါတလီ စိတ်ထဲမှာဟိစွာကို ချရီးရေ၊ တခါတလီ ခံစားရစွာကို ချရီးရေ။ အချေခါကနိန် အကျယ်ကြီးမငိုတတ်။ ခံစားရကေ စာအုပ်ထဲမှာချရီးထားလိုက်တေ။ ယင်းပိုင်အလုပ်တိအတွက်နန့် မိသားစုပါးမှာ ဝိုင်းရယ်ခံခရရေ။ “သမီးကြီးကေ ဇာလုပ်ဖို့လဲ”ဆိုရေ မိန်းခွန်းကို “ကလောင်ကိုင်ဖို့” လို့ ကြကြီးကျကျယ် ပြန်ဖြေမိရေအတွက် ၉နှစ်သမီးချေ အသတ်ခံဖူးခရေ။ ဆရာဝန်လုပ်ဖို့လို့ပြောခိုင်း၊ ရည်ရွယ်ခိုင်းရေ စကားတိကို ခါးခါးသီးသီးခေါင်းခါပြီးကေ ကလောင်ကိုင်ဖို့လို့ လှိုက်လှိုက်လှဲလှဲ ခေါင်းမာ ပနာ ကိုယ့်ရင်ဘတ်ကိုကိုယ် ကတိအခါခါပီးခရေ။ ယင်းအရွယ်ကနိန် မာခရေ ခေါင်းကို မွီးပီးလိုက်တေ မိဘကိုယ်တိုင်က လက်ဖျားခါခကတ်ပါယင့်။ စာတိရီးရေ၊ အဆုတ်ခံခရရေ။ ဘောင်မဝင် စည်းမဟိရေစာတိ လစ်လျူရှု ခံခရရေ။ စာကိုရီးရေ အတွေး၊ ဆန္ဒ၊ နှလုံးသားမှာလေ့ ဘောင်မဟိရေအတွက် သင်းချိုစာတိ ဘောင်မဟိစွာကတော့ကေ မဆန်းပါလေ။ တချို့က လှောင် ကတ်တေ၊ တချို့က အားပီးရေ၊ တချို့ကတော့ကေ ဖာသိဖာသာ။

လောကကြီးထဲက မျက်ဝန်း၊ နှလုံးသားနန့် ခံစားချက်တိကို ရင်ဘတ်ချင်း၊ နှလုံးသားချင်း၊ ခံစားချက်ချင်း ဖတ်ပီးရစွာကို မက်မောမိရေ။ နှလုံးမှာ အခန်းဇာနှစ်ခန်းလဲ သင်းချို စိတ်မဝင်စားခ။ နှလုံးသားထဲက ငိုသံ၊ ညည်းညူသံနန့် တောင့်တသံတိကို နားစိုက်ထောင်ဖို့ရာ အားယူခရေ။ သူရို့ရင်ထဲမှာ မြိုသိပ်ထားရစွာတိ ဇာလောက်များလေလို့ရာ ရှာချင်ခရေ။ နှလုံးသားချင်း နားထောင်၊ နှလုံးသားနန့် ဘာသာပြန်ဖို့ ကြိုးစားနိန်ခရေ။ အချိန်တိရာ ကုန်မှန်းမသိ ကုန်လားရေ။ စာရီးစွာ စာအုပ်တိလေ့ တစ်အုပ်ပြီးတစ်အုပ် ခုံထက်မှာ ပုံတက်လာရေ။ သင်းချို စာရီးလက်ရာ တက်မလာခ။ တိုးတက်လာစွာတစ်ခုက လူတိ၊ မိသားစုတိနန့် အယူအဆတိ သွေဖီလာရေ။

ကျောင်းခန်းထဲက အဆိုးဆုံးလို့ ပြောတတ်ကတ်တေ ကျောင်းသား နန့်တတူ မုန့်ဝယ်စားတတ်လာရေ။ သူ့အကြောင်း ကိုယ့်အကြောင်း ထိုင်ပြော ဖြစ်ကတ်တေ။ သူ ကျောင်းထွက်ပြီးရေအကြောင်းတိကို မိန်းဖြစ်၊ ပြောဖြစ် ကတ်တေ။ လူတိက ကောင်းရိုင်းရေ ဆိုးရေလို့ ပြောကတ်တေသူက နောက်ဆုံးခါ သင်းချိုကို ညမချေလို့ ခေါ်တတ်လာရေ။ သူ့မှာလေ့ သူ့ အယူအဆ သူ့ဇာတ်လမ်းချေနန့် သူ။ သူကမိန်းဖူးရေ “ မမချေတိက ငါ့ကို ကြောက်ကတ်တေ၊ နင်ငါ့ကို မကြောက်လား” လတ်။ ငါ နင့်ကို တစ်ခါလေ့ မကြောက်ခလို့ သင်းချို ပြန်ဖြေလိုက်တေခါ သူကောင်းရယ်ရေ။ သူ့ အကြောင်းတိကိုလေ့ စာအုပ်ထဲမှာ ရီးထားခရေ။ သူ့ကို ဇာဖြစ်လို့ ဆိုးရေလို့ သတ်မှတ်ခကတ်လေ မသိ။ သူ့ကိုသတ်မှတ်ထားကတ်တေ “ဆိုးရေ” ဆိုရေ ဝေါဟာရနန့်၊ ဆိုးကြောင်းကိုသိသာအောင် ဖေါ်ထုတ်ပြကတ်တေ အကြည့်တိ က သူ့ကို ပိုဆိုးစီဖို့ တွန်းအားတိ မဟုတ်လားဆိုရေ မိန်းခွန်းတိ၊ အယူအဆတိ ခေါင်းထဲကို တန်းစီလို့ ဝင်ရောက်လာရေ။ အမှန်ဆိုကေ ဆိုးရေ ဆိုရေစကားတိက သူ့ကို ဆိုးဖို့ပါမစ် ပီးလိုက်တေပိုင်။

အခန်းထဲက အလိမ္မာဆုံးနန့်လေ့ စကားတိပြောဖြစ်ကတ်ယင့်။ တခါတလီ သူလုပ်ချင်ရေ ဆန္ဒအမှန်တိကို အလိမ္မာဆုံးဆိုရေ သူ့ဂုဏ်ပုဒ်နန့် တားဆီးချိုးဖျက် ခံထားနိန်ရရေ။ တခါတလီ သူ့မှာ ယင်းဂုဏ်ပုဒ်နန့် လိုက်အောင် စောင့်စည်းနိန်ရစွာက ဝန်ထုပ်ဝန်ပိုး။ သူလေ့ သနားဖို့ကောင်း ပြန်ရေ။ သူ့မျက်လုံးတိကလွဲကေ သူ့စကားလုံးတိ၊ အမူအယာတိက ပွင့်လင်းဖို့ ခက်ခဲရေလို့ သင်းချိုထင်မြင်မိခရေ။ စာအုပ်စင်မှာ သူ့အကြောင်းကိုရီးထားရေ စာအုပ်တစ်အုပ်တိုးလာခပြန်ရေ။ စာရီးလက်ရာက တက်မလာသိမ့်။

သင်းချိုရို့အိမ်နားက အကျော်ဆိုင်မှာ အလုပ်လုပ်တေ စားပွဲထိုးချေ တိနန့်လေ့ စကားပြောဖြစ်တေဗျာယ်။ သင်းချိုထက် အများကြီးငယ်ရေ ၁၁ နှစ်၊ ၁၂ နှစ် အရွယ် ယင်းအချေတိ ပက်ခုံးထက်မှာ သင်းချိုထက်ကြီးရေ တာဝန်တိနန့်။ သူပြောလိုက်ကေ သူ့မေမေ၊ သူ့ညီချေ၊ သူ့ညီမချေ။ ပင်ပန်းကေလေ့ ယင်းအကြောင်းကိုပြောတိုင်း သူ့မျက်ဝန်းထဲမှာ အရောင် အမျိုးမျိုးဖြတ်ပြီးလားရေ။ သူ့နှလုံးသားကအရိပ် မျက်ဝန်းမှာ လာထင်ဟပ်တေ ထင်ယင့်။ ပြောနိန်ယင်းနန့် မျက်ရည်တိ စီးကျလာဖို့ဗျာယ်ပိုင်၊ ချက်ချင်းပင် ပန်းတိပွင့်လားဖို့ အပြုံးတိနန့်၊ တိုက်ပွဲဝင်ဖို့ စစ်သူကြီးတစ်ယောက်ပိုင်လေ့ ရဲရင့်နိန်ယင့်။ ယင်းအချိန်ဆိုကေ သူ့မျက်လုံးချေတိ သက်တန့်တစ်စင်းပိုင် အရောင်စုံလို့၊ အရည်ကြိုင်တိလဲ့လို့ ကောင်းလှရေ မျက်ဝန်းချေတိရာမနား။ ဘေးကပံ့ပိုးဖို့ eyes shadow မလို၊ ကာလာ မလို။ အေပိုင်မျက်ဝန်းချေတိကို ကြည့်ရစွာ ကမ္ဘာကျော်ဆိုရေ လျှို့ဝှက်ချက်တိနန့် အဓိပ္ပါယ်ဖေါ်ရခက်တေ (ပွင့်လင်းမှုမဟိရေ) မိုနာလီဇာအပြုံးကို ကြည့်ရစွာထက် ပိုသဘောကျမိ သိမ့်ရေ။ သူစားပွဲထိုးနိန်ရေအချိန်တိဆိုကေ အပြုံးဆိုရေ မျက်နှာဖုံးကို တပ်ထားယင့်။ ယင်းအချိန် သူ့အပြုံး၊ သူ့လှုပ်ရှားမှုတိ ပိရိသေသပ်ကေလေ့ ရီချင်းတူကေတောင် အတက်အကျဟိရေ ပင်လယ်ပြင်ကို ကြည့်ရစွာနန့်၊ ရီသီနိန်ရေ ကန်ရီပြင်ကို ကြည့်ရစွာပိုင် ကွာခြားရေ။ သူဇာလောက်ပြုံးပြုံး သူ့မျက်လုံးတိက အဓိပ္ပါယ်မဟိ သီဆုံးနိန်ရေ။ သူ့အကြောင်းကိုလေ့ စာရီးထားလိုက်တေ။

အရာရီးဖြစ်လိုက်စွာက အိမ်နားက အမည်းရောင် ခွီးမကြီး အကြောင်း။ သူ့ကို အစခါ သင်းချို သတိမထားမိခ။ သူအချေမွီးခါမှ သူ့မိခင်စိတ်နန့် အပြုအမူက သင်းချိုကို ညှို့ငင်ယူလားစွာ။ ဇာနိန်ရာတိကို အစာလားစားလေ့တော့ခါမသိ၊ တခါတလီ ချောင်းတိကူးလို့ လာစွာကိုလေ့ မြင်ယင့်။ တစ်ရက်နိန့် သင်းချိုရို့အိမ် ရှိတတည့်မှာ အန်ပလိုက်တေဗျာယ်။ ဗြုန်းခနဲခါ သင်းချို ရွံလားရေ။ သူ့ကို လိုက်ထုတ်ပလိုက်ဖို့လို့ စဉ်းစားမိပြီးကေ အားယူလိုက်ခါမှ အဲ . . . တွိလိုက်ရရေမြင်ကွင်းက သင်းချို ဆို့နင့်လားလာ၊ မှင်သက်လားမိလာ အသေချာဝေခွဲဖို့ခက်တေ ခံစားချက်တစ်မျိုး ရင်ထဲမှာ နစ်ပနာဝင်လားရေ။ သူ့အချေ အဖြူ၊အမည်း အရောင်စုံချေတိက ခေါင်းချေတိ တိုးပနာ၊ ဝှေ့ပနာ ယင်းအန်ဖတ်ကို အလုအယက် စားနိန်ကတ်စွာကိုး။ အမိသေခွီးမကြီးက ဘေးနားချေမှာ ဆောင့်ကြောင့်ထိုင်လို့။ အမှန်က သူစားလာစွာမဟုတ် သူ့ဝမ်းထဲမှာ မြိုထားပနာ ပါဆယ်ဆွဲလာစွာ။ သူ့ရင်ထဲမှာ ပီတိဖြစ်နိန်ဖို့ထင်ယင့်။ ကျေနပ်နိန်ဖို့ထင်ယင့်။ တရားလွန်ရွံတတ်တေ သင်းချိုတစ်ယောက် နောက်ဆိုကေ ခွီးမကြီးအန်ဖတ်ကို ကြည့်ရစွာ ကဗျာကောင်းတစ်ပုဒ်ကို ဖတ်ရစွာပိုင်၊ ယင်းအပုံထဲက တန်ဖိုးဟိစွာတိ ထွက်လာဖို့ပိုင်၊ ကောင်းလှရေ ညစာရှုခင်းကို ကြည့်ရစွာထက် အရသာဟိရေ ပိုင် ခံစားလာရရေ။ ယင်းအန်ဖတ်ပုံထဲမှာ ထကြွပနာ ပျံ့နှံ့နိန်ရေ မေတ္တာနန့် စေတနာကို ထထင်းရှရှားမြင်နိန်ရယင့်။ အေပိုင် သဘာဝကို မေတ္တာကို မြင်ခွင့်၊ ကြည့်ခွင့်၊ မြင်အောင်ကြည့်ပီးခွင့် ရစွာအတွက် ကကောင်း ကျေနပ်မိခပါရေ။ ယင်းအလုပ်ကို သူနိန့်တိုင်းမပျက်မကွက် လုပ်နိန်ခစွာ။ ယကေ သူ့အတွက်လေ့ စာရီးပလိုက်တေဗျာယ်။ ရီးစွာတော့ကေ ရီးရေ၊ သိရေအတိုင်း လက်ရာကတက်မလာပါသိမ့်။

အေပိုင်နန့် ကျောင်းတက်ခါ ကျောင်းက ဒပြုတ်ပင် အကြောင်းကို လေ့ ရီးရေဗျာယ်။ အုပ်စုလိုက် ထီးကို မယ်ဒလင်ပိုင်တီးလို့ တေးခင်းဆို ကတ်စွာအကြောင်း၊ ချိန်းကြိုးပြုတ်ကျရေ စက်သီးအကြောင်း၊ ဟိုအကြောင်း၊ အေအကြောင်း ရီးလာခစွာ။ အ်ိမ်မှာလေ့ အပြောခံပနာ ရီးခပါယင့်။

အလုပ် စလုပ်ဖူးရေအချိန် ရောက်စွာနန့် ငွေခိုးပြည့်နိန်ရေ မျက်လုံးတိကို စမြင်ဖူးလာခရေ ။ မြင်ကွင်းအသစ်၊ လောကအသစ်ကို မြင်ရခါ ရီးချင်စွာလက်တိ ယားစိ၊ ယားစိ။ လူတစ်ယောက်ရင်ထဲက ကိုယ်ကျင့် ကတိသစ္စာထက် ကတိအတွက် စာရွက်ထက်မှာ ထိုးထားရေ ယင်းလူ လက်မှတ်ကို ပိုလို့ယုံကြည်လက်ခံရေ အသိုင်းအဝိုင်း။ ထိုလူကို ထိုပိုင်၊ အေလူကို အေပိုင် စွပ်စွဲပလိုက်တေ အတွေးတိ၊ အကဲစမ်းရေ မျက်ဝန်းတိ။ တမင်တကာ မြင်အောင်ပြလာ၊ ဖုံးယင့်သားနန့် မလုံစွာလာမသိ ထထင်းကြီး မြင်လာရရေ။ ယင်းမျက်ဝန်းတိနန့် နိန်သားကျနိန်ရေ သူရို့ကို ကြောက်လေ့ ကြောက်ခရေပိုင်၊ သနားလေ့ သနားမိခရေ။ သူရို့တိကို မိန်းကြည့်ချင်ရေ မိန်းခွန်းတိလေ့ ရင်ထဲမှာ အပြည့်ဟိနိန်ခယင့်။ လူတိစွာ အိပ်နိန်ရေ အချိန်ဆိုကေ ဟန်ဆောင်မှုမဟိ ပကတိ ရိုးသားနိန်တတ်တေဆိုပနာ ကြားဖူးထားလို့ (အိမ်ကလူအားလုံးကို လိုက်ကြည့်ထားလိုက်ဗျာယ်) ယင်းသူရို့တိ အိပ်နိန်ရေ မျက်နှာချေတိကိုလေ့ မြင်ဖူးချင်ခရေ။ လောဘ၊ ငွေခိုးတိ ကင်းစင်နိန်ရေ သူရို့မျက်နှာချေတိက ဇာပိုင်ချေဟိဖို့လဲချင့်။ သူရို့တိ လေ့ တစ်ချိန်လောက်တော့ကေ ရိုးသားကတ်ဖို့စွာရာလေ။ အိပ်ယာက ထစွာနန့် မျက်နှာဖုံးကို ကောက်စွပ်ထားရရေ သူရို့ဘဝတိကို သနားမိလို့လေ့ စာရီးထားလိုက်ယင့်။ သူရို့ကတော့ကေ သူရို့မျက်နှာဖုံးတိနန့် သူရို့ နိန်သားတကျ ။

စာအုပ်တိထဲမှာလေ့ ဈီးကအသုတ်စုံပိုင် အကြောင်းအရာအစုံ၊ ရခဲသုတ်တစ်ခွက်ပိုင် အရောင်တိစုံလို့။ အယင်လေ့ ရီးခရေ၊ အဂုလေ့ ရီးနိန်တုန်း၊ နောက်လေ့ ရီးနိန်ဖို့သိမ့်။ အေနှလုံးသားကို၊ အမြင်တိကို ဘောင်ခတ်ထားလို့ မရရေ သင်းချို၊ ဘောင်မဝင်ရေ စာတိကို ရီးနိန်မိတုန်း သိမ့်ပါ။ စာအုပ်ဝယ်၊ ခဲတံဝယ်၊ ဘောပင်ဝယ်နန့် မုန့်စားဖေ့သာတိလေ့ စာရီးခုံထက်မှာ ဘဝပြောင်းလို့ရာလားခရေ သင်းချိုကတော့ကေ ညံ့ဖျင်းတုန်း၊ ခေါင်းမာနိန်တုန်းပါဗျာယ် ။

သင်းချို