ဝရံတာမှာ မီးပိတ်ပနာထိုင်နိန်ယင်း ကောင်းကင်ကို မော့ကြည့်ပြီးကေ စဉ်းစားမိရေ။ သြော် . . . အေနိန်ရာကနိန် အေကောင်းကင်ကို မော့ကြည့်ခွင့်ရဖို့အတွက် အေနိန့်စွာ အချိန်ကာလတစ်ခု ကြာအောင်ထိ နောက်ဆုံးဖြစ်နိန်နိုင်ရေ။ ဇာအထိလို့ ကန့်သတ်မထားခရေ အချိန်တစ်ခုအထိ ၂ နှစ်ကျော်ကြာအောင် တစ်ယောက်တည်း ထိုင်ဖူးခရေ အေနေရာချေနန့် ဝီးနိန်ရဖို့သိ။ ကောင်းကင် ကြီးကလေ့ အေနိန့်ခါမှ ဝမ်းနည်းဖို့ကောင်းလောက်အောင် လှနိန်ရေ။ ကြည့်နိန်ယင်းမှာပင် ကြယ်ချေတစ်လုံး ကြွီကျလားခရေ။ အမှန်ဆိုကေ အေကြယ်ချေလေ့ ကြွီစွာ ဟုတ်ချင်မှဟုတ်ဖို့။ နိန်ရာဒေသအသစ်တစ်ခုကို ရွိပြောင်းလားစွာက မဖြစ်နိုင်လာ။
အိမ်ထဲမှာ အသံတိ တိတ်ဆိတ်နိန်ရေ။ ယကေလေ့ မိဘနှစ်ယောက်လုံးရင်တိမှာ ဆူညံသံတိဟိနိန်လီဖို့စွာကို သိရေ။ အိပ်နိန်ရေပိုင် မျက်လုံးကိုမှိတ်လို့ ငြိမ်ပနာလှဲနိန်ကတ်တေ ယင်းရင်ဘတ်နှစ်ခုလုံး လှုပ်ရှားပြီးလွှားနိန်ကတ်ဖို့လေ့ အသေအချာဗျာယ်။ ခေါင်းမာပနာ ကြီးခရေ ဆန္ဒတိအတွက် ပါပါနန့် မေမေကို ရှိခိုးကန်တော့ပါယင့်။
အယင်က အေပိုင်အိပ်မရရေနိန့်တိဆိုကေ မိုးအယင်လင်းဖို့စီ ဆုတောင်းဖူးခစွာ။ အေနိန့်၊ အေအချိန်၊ အေနေရာမှာ အချိန်တိ ရပ်တန့်ပီးပါ။ စီးကျလာခရေ မျက်ရည်တိကို သုတ်ပစ်ချင်စိတ် မဟိခ။ လီချေ တဟုတ်တိုက်လိုက်ကေ မျက်ရည်တိနန့် ပါးပြင်နှစ်ဘက် အီးစက်လားရေ။ ငါရွီးချယ်ခရေ လမ်းကြောင်းအတွက် ငါကိုယ်တိုင်တောင် အေလောက်ခံစားနိန်ရကေဆိုရေ စိတ်ကူးနန့် မိဘတိကို ဆက်မတွေးဝံ့ . . . အေညည့်ကို အတတ်နိုင်ဆုံး ဆွဲဆန့်ထားလိုက်ချင်ရေ။ နာရီစက်သံကလေ့ အေနိန့်ခါမှ ပိုကျယ်နိန်လာ။ အထဲကို တစ်ခေါက်ဝင်ပနာ နာရီထဲက ဓါတ်ခဲကိုဖြုတ်ထားလိုက်တေ။ အေလောက်တောင် အသံကျကျယ်နန့် ပြီးချင်ရေ အကောင်။ မိဘနှစ်ယောက်အိပ်ခန်းကို လှမ်းဝင်လို့ ခြီရင်းမှာထိုင်ပနာ အကြိမ်ကြိမ် ရှိခိုးမိသိရေ။ ပြီးမှ ပြန်ထွက်လာပနာ ဝရံတာမှာ ပြန်ထိုင်ဖြစ်တေ။ မိုးလင်းကေဆိုရေ အတွေး ခေါင်းထဲကို ရောက်လာစွာနန့် ခေါင်းကို ကကြမ်းချေ ခါပလိုက်ယင့်။ အခါကြမ်းလို့ ယင်းအတွေးတိ ထွက်ကျလားပတ်စီလေ။
နိန့်ခင်းက ဟိုနှစ်ယောက်နန့် ဆိုင်မှာ ထိုင်နိန်ခစွာကို အတွက်ပေါ်လာရေ။ သုံးယောက်လုံးထိုင်နိန်ကတ်စွာ လောကကြီးနန့် ကင်းကွာနိန်ရေပိုင်။ နိန်ကျကျွက်ပူဗျာယ် ဆူညံနိန်ရေ ပတ်ဝန်းကျင်နန့် တခုလေ့မဆိုင်ပိုင် ရခဲတောင်ထက် စိမ့်အီးနိန်ရေ ခုံဝိုင်း။ ကော်ဖီခွက်ကို စိုက်ကြည့်နိန်ရေ အထွန်းက “နင့်ခေါင်းထဲမှာ အေပိုင်အတွေးတိမထားကဲ့၊ နင်စွာ အချေကနိန် အားလုံးကို ဦးဆောင်နိုင်ရေ လူတစ်ယောက် မဟုတ်လား။ ငါရို့အားလုံး မျက်ဝန်းတိကို နင်မဖတ်တတ်လား။ နင့် ဆုံးဖြတ်ချက်၊ နင့်လုပ်ရပ်တိအားလုံးကို ငါရို့က အားကျ၊ သဘောကျ လာခကတ်စွာလေ။ နင်စွာ မမချေတစ်ယောက် ဆိုကေလေ့ ငါရို့တိ အားလုံးထဲမှာ သတ္တိအဟိဆုံး၊ ဇွဲအကောင်းဆုံးဗျာယ်။ ငါရို့တစ်အုပ်စုလုံး ကိစ္စတိုင်းကို နင်ဆုံးဖြတ်တေအတိုင်း လိုက်လုပ်ခကတ်စွာလေ။ နင်တစ်ယောက်မဟိစွာနန့် ငါရို့ဝန်းကျင် ခြောက်သွိလားဖို့စွာတော့ကေ သေချာရေ။ ယကေလေ့ ငါရို့မှာ ငါရို့ကိစ္စတိကို ဆက်လုပ်နိန်ကတ်ရဖို့စွာဗျာယ်။ နင့်စိတ်ထဲ၊ နင့်နှလုံးသားထဲမှာ စွဲနိန်ရေ ရည်ရွယ်ချက်တိစွာ မဖြစ်နိုင်လို့ ယူဆခကတ်တေ အသိုင်းဝိုင်းတစ်ခုလုံးကို နင်ကိုယ်တိုင်လုပ်ပြဖို့ ရလာရေ အခွင့်အရေးအတွက် အဂု နင့်ခေါင်းထဲမှာရောက်နိန်ရေ အတွေးတိကို ထုတ်ပလိုက်ဖိ. .” ။ သင်းချိုတစ်ခုလေ့ ပြန်မပြောမိ။
ဇော်ထူးပါးက သက်ပြင်းချသံထွက်လာပြီးကေ ဝင်ပြောရေ။ “သူငယ်ချင်းတိအားလုံးထဲမှာ နင့်ကိုအချစ်ဆုံးလို့ ငါပြောဖူးရေမနား။ ဇာဖြစ်လို့လဲသိလာ၊ နင့်စိတ်ဓါတ် နင့်လုပ်ရပ်တိကိုချစ်လို့။ နင်စွာ ဇာကိစ္စကိုမဆို သတ္တိနန့်ရင်ဆိုင်ဖြေရှင်းတတ်လို့၊ ပြီးကေ တစ်ယောက်ယောက် တစ်ခုခု ဖြစ်ကေ ကိုယ့်ကိစ္စမဟုတ်ဆိုပနာ ငြိမ်မနိန်တတ်လို့။ အဂုလေ့ နင်လုပ်ချင်စွာတိကို လုပ်ဖို့အခွင့်အရေး နင့်လက်ထဲမှာ ဆုတ်ကိုင်မိနိန်ဗျာယ်လေ။ နင်တောက်လျှောက် ကြိုးစားလာခစွာ၊ ခေါင်းမာလာခစွာ အေချင့်အတွက် မဟုတ်လား။ လူတိနားချိန်မှာတောင် နင်မနားဘဲနန့် ခြီလှမ်းတိ ဆက်တိုက် လှမ်းနိန်ခစွာလေ၊ အဂု လှဂါးတစ်ဆင့်ကို တက်ဖို့ခါမှ နင်နောက်တွန့်နိန်ကေ၊ အယင်ချိန်တိကို ပြန်မက်မောနိန်ကေ နင်မရပ်မနား လားခရေ ခြီလှမ်းတိအတွက် ဇာလောက်နှမြောဖို့ ကောင်းဖို့လဲ။ ရှိကို ဆက်လားပါ။ ငါရို့ဆိုစွာ နင့်နောက်ဘက် အဝီးကြီးမှာ ပြတ်ကျန်နိန်ခစွာ ကြာဗျာယ်။ ဇာလောက်ပင်ဝီးဝီး ငါရို့သံယောဇာဉ်တိနန့် ချိတ်ဆက်ထားကတ်မယ်လေ။ နင့်ကို ငါရို့ E-Mail တိပို့မယ်၊ နင်လေ့ပို့။ နင်ရှာတွိရေ ဆန်းသစ်တေအတွေးခေါ်တိ၊ လုပ်ရပ်တိ၊ သဘောသဘာဝတိ ငါရို့ကိုပြန်သင်ပီးလေ။ နင်လာလည်ကေ တတူစစ်တွေကိုပြန်လို့ အားလုံးနန့် ဆုံကတ်ဖို့လေ။” သူ့စကားအဆုံးမှာ သင်းချို လီကိုမှုတ်ထုတ်လိုက်တေ။ “အေးပါ၊ ငါလေ့ အဂုအချိန်ရောက်မှ နောက်ဆုတ်ချင်ကေတောင် မဆုတ်ဖို့ဆုံးဖြတ်ထားရေ။ ယကေလေ့ ငါ့ခေါင်းထဲမှာ ဇာတိဟိလို့ ဟိနိန်မှန်းတောင် မသိဗျာယ်။ လေယာဉ်ထက်ကို မတက်ခင်အချိန်ထိ နောက်ဆုတ်လို့ရရေဆိုရေ အတွေးတိ ခေါင်းထဲကို ရောက်လာအောင်ထိ ငါပျော့ညံ့နိန်ရေ။ ငါနင်ရို့တိကိုလွမ်းနိန်၊ အောက်မိနိန်ဖို့။ စစ်တွေက ငါရို့တစ်အုပ်စုလုံးကို ငါလွမ်းနိန်ဖို့။ တန်းဆောင်မုန်းလပြည့်ကျလို့ နင်ရို့အားလုံးဆုံဖြစ်ကေ ငါမပါနိုင်ဗျာယ်။ ငါ ကကောင်း ခေါင်းမာခဗျာယ်လာ မသိနန်း. . .” ။ ယင်းလောက်ရာ ပါးစက ထုတ်ပြောဖြစ်ကေလေ့ အမှန်ရင်ထဲမှာက ငါတက်လှမ်းရဖို့ အေခြီလှမ်းအတွက် ကြောက်နိန်မိစွာကို နင်ရို့သိအောင်မပြခစွာရာ။ ဇာကိုမှန်းမသိ ငါကြောက်နိန်ခရေ။
“အဟွတ်၊ဟွတ်” မေမေ ခြောင်းဆိုးသံကိုကြားမှ စဉ်းစားနိန်စွာတိ လွတ်ထွက်လားပနာ အဂုပစ္စက္ခတ်ကို ပြန်ရောက်လာရေ။ ခြီသံကြားရေ။ မေမေ အပြင်ကိုထွက်လာစွာလာ။ “သင်းချို၊ သမီး အိပ်ဖိလေ။ နက်ဖြန်ခါ ပင်ပန်းနိန်မေ၊ ထ အိပ်ဖိ”။ ပါးထက်ကမျက်ရည်ကို မေမေ မမြင်အောင် ဆံပင်နန့် ကာထားလိုက်တေ။ “သင်းချို မအိပ်ချင်သိပါမေမေ။ အေနေရာချေမှာ ထိုင်ကောင်းပါရေ။ မေမေ အိပ်ခီပါဖိ၊ သင်းချို အိပ်ချင်လာခါ ဝင်အိပ်လိုက်ပါမေ။” “ယင်းပိုင်ဆိုကေ အင်္ကျီချေတစ်လုံး ထပ်ဝတ်ထား၊ တဖဲ့ချေအီးရေထော။ အကြာကြီးလေ့ ထိုင်မနိန်ကဲ့၊ တနားချေကေ ဝင်ဖိနန်း” ပြောပြီးကေ မေမေပြန်ဝင်လားခရေ။ ပါပါနန့် စကားပြောသံချေတိကို ကြားရရေ။ သင်းချိုကို ခွင့်လွှတ်ကတ်ပါ။
‘ပါပါ’ . . . သင်းချိုကို အချေခါကပင် နားလည်ပီးခရေ အဖ။ လူတိက သမီးကို ကကောင်း အလိုလိုက်တေလို့ ပြောတတ်ကတ်ကေလေ့ ပါပါက သင်းချိုကို အလိုလိုက်စွာထက် နားလည်ပီးစွာ။ အလုပ်ကလာကေလေ့ အယင်ဆုံး “သင်းချို ဝါ” လို့ရှာတတ်တေ ပါပါ။ ၂၀၀၇ ခုနှစ် သင်းချို ရန်ကုန်ကိုလားရဖို့ခါ ပါပါက စကားတစ်ခွန်းတည်းရာမှာရေ “ရန်ကုန်အိမ်မှာ မကျန်လိုက်ကဲ့နန်း၊ ယင်းမှာနိန်ဖို့ဗျာယ်လို့ မပြောကဲ့။ ပါပါက သမီးမရှိကေ နိန်လို့မရတတ်” လတ်။ သင်းချိုငိုဖို့ မျက်ရည်တစ်စက် အကျမခံရေ အဖလေ။ သင်းချိုကို ကောင်းကောင်းနားလည်ပီးရေ ယင်းပါပါကို ကာဗာယူလို့ သင်းချိုခေါင်းမာလာစွာ အေနိန့်အထိ။ “စစ်တွေအိမ်မှာ တတူနိန်လို့ မိသားစုစီးပွါး လုပ်ကတ်မေနန်းရာ” လို့ ပါပါပြောတိုင်း သင်းချိုက “သင်းချို professional ဖြစ်ချင်ပါရေ ပါပါ။ မဖြစ်နိုင်ဆိုစွာမဟိလို့ ပြချင်ပါရေ။ သင်းချိုကို အိမ်မက်မက်နိန်ရေလို့ ပြောကတ်တေ လူအားလုံးကို ပြင်းပြရေအိမ်မက်ဆိုစွာ လက်တွိအကောင်အထည်ဖေါ်ဖို့ ပထမဆုံး ခြီလှမ်းဆိုစွာကို ပြချင်ပါရေ” လို့ ပြန်ပြောမိခရေ။ အေသမီး တဇောက်ကမ်းကို ခွင့်လွှတ်ပါ။ သင်းချိုရင်ထဲမှာ ရည်ရွယ်ချက်တိနန့် ပြည့်နိန်လို့ပါ။ နိုင်ငံခြားကို အထင်ကြီးလို့မဟုတ်ပါ။ သင်းချိုလုပ်ချင်ရေ ဆန္ဒတိက ပြည်တွင်းမှာနိန်ပနာ သင်းချိုလုပ်နိုင်ရေ အတိုင်းအတာထက် အဆမတန် များနိန်လို့ပါ။ သင်းချိုမှာလေ့ အချိန်အတိုင်းအတာဟိပါရေ။ သင်းချို Target ကိုရောက်ပြီးကေ ပြန်လှည့်လာဖို့စွာပါရာ။ ယင်းအချိန်ဆိုကေ မေမေ၊ ပါပါရို့ အေပိုင် စိုးရိမ်ခံစားရအောင် မလုပ်ပါဗျာယ်။ မိဘနားမှာ နိန်ပနာ သင်းချိုရင်ထဲက ရည်ရွယ်ချက်တိကို တစိုက်မတ်မတ် လုပ်လီပါဖို့ဗျာယ်။ အဂု လောလောဆယ်တော့ကေ သင်းချို ခေါင်းမာပါရစီဦး။
သင်းချိုလေ့ ကြောက်နိန်မိစွာပါဗျာယ်။ ယကေလေ့ ပါပါနန့် မေမေက သင်းချိုကို ယုံကြည်မှုပီးပါ။ ပါပါရို့ယုံကြည်မှုစွာ သင်းချိုအတွက် ခွန်အား၊ သတ္တိ။ ရှိဆက်ရေ ခြီလှမ်းတိုင်းမှာ “ငါ့ကို ယုံကြည်မျှော်လင့်နိန်ကတ်တေ” ဆိုရေ အတွေးနန့် အားလုံးကို ရင်ဆိုင်ကျော်ဖြတ်ခွင့်ရအောင် သင်းချိုကို ယုံကြည်ကြောင်း ပြပီးပါ။ သင်းချိုကို လိုအပ်တေလူတိအတွက် သင်းချို ကိုယ့်စွာကိုယ် အသုံးချခွင့်ပီးပါ။ သင်းချို အိမ်ပြတင်းပေါက်အပြင်ကို လှမ်းကြည့်ခွင့်ပြုပါ။ မြင်ခရရေ ပတ်ဝန်းကျင်ချေအတွက်၊ ကမ်းလက်ကို မျှော်လင့်နိန်ကတ်တေ နှလုံးသားချေတိအတွက် သင်းချို ခေါင်းမာချင်ပါရေ။ အေမိဘက မွီးလာရေ အေသမီးစွာ လူသားဆန်ရေ စိတ်ဓါတ်နန့် လုပ်ရပ်ချေတိကို လုပ်ခွင့်ရပါရစီ။ အချေခါ ဖေ့သာအလိတ်ချေကောက်ရလို့ ငိုခရေ အေသမီးကို မေမေ ကောင်းချစ်တေလို့ ပြောဖူးပါရေလေ။ အဂုလေ့ အခြားလူတိမျက်ရည် အေပါးမှာ ကျပီးပါရစီ။ သူရို့တိမျက်ရည်ကို အေလက်နန့် သုတ်ပီးပါရစီ။ သူရို့မျှော်လင့်ချက်တိကို အေနှလုံးသားထဲမှာ ထပ်တူမျှော်လင့်ပီးခွင့်ပြုပါ။ ကိုယ့်မျက်စိ ရှိတမြင် မဟုတ်ဘဲနန့် လောကကြီးတစ်ခုလုံးကို မျက်စိဖွင့်ကြည့်ခွင့် ရချင်ပါရေ။ နွီးထွီးမှုကို လိုအပ်နိန်ရေ လူအားလုံးကို မေတ္တာတရားနန့် လွှမ်းဖက်ထားပီးချင်ပါရေ။ ကမ်းလက်ချေတစ်ဘက် စောင့်စားနိန်ရေလူတိကို အေလက်နှစ်ဘက်နန့် တတ်နိုင်သမျှ လက်တွဲထားချင်ပါရေ။ ယင်းတွက်နန့် သင်းချို ရင်ထဲမှာဟိနိန်ရေ ကြောက်ရွံ့မှု၊ မိသားစုနန့်ဆိုင်ရေ ခံစားချက်တိနန့် သိမ်ငယ်မှုတိကို သိုဝှက်ထားပါရစီ။ ပါပါ၊မေမေရို့ရင်ထဲကိုလေ့ မမြင်ကန်ဆောင်ခွင့် ပီးပါ။ အေသမီး မလိမ္မာ မိုက်မဲစွာကို သိပါရေ။ ယကေလေ့ ဆက်မိုက်မဲခွင့်ကို ပီးပါ။ သင်းချိုကို “ငါ့သမီးစွာ အရာအားလုံးကို လုပ်နိုင်ရေ”လို့ နှစ်သိမ့်ရေ အပြုံး လက်ဆောင်ပီးပါ။ ယင်းအပြုံးကို အဆောင်အဖြစ် နှလုံးသားနန့် မကွဲမကွာ တစ်သက်လုံး ဆောင်ထားပါမေ။
လီချေတဟုတ်တိုက်လိုက်ခါ မျက်ရည်တိ ခြောက်နိန်ရေ ပါးပြင်နှစ်ဘက်က တင်းပနာ ခံစားလိုက်ရရေ။ ပြုံးကြည့်လိုက်တေ။ ကိုယ့်စွာကိုယ် ပြန်ပြုံးကြည့်လိုက်တေ။ တနားက ရပ်ထားလိုက်တေ နာရီကိုလေ့ ပြန်လားခွင့် ပီးလိုက်တေ။ လွတ်လပ်ခွင့်ပီးလိုက်စွာနန့် သူကလေ့ ညှာသံပီးပနာ သူ့တာဝန်ကိုသူ ထမ်းဆောင်နိန်ယင့်။
ဝရံတာ သံပန်းတန်းခါးကိုဖွင့်ဗျာယ် ကောင်းကင်ကို မော့ကြည့်လို့ အားရပါးရ လီရှုပလိုက်တေ။ အေဝရံတာမှာ တစ်ယောက်တည်းထိုင်ပနာ အေပိုင်ညည့်မျိုးတိကို ဖြတ်ကျော်လာခစွာ ၂ နှစ်တောင် ကျော်လာခဗျာယ် မနား။ တရက်တရီ မိုးတလင်းစာထိုင်ရွီးဖြစ်ခရေ၊ တရက်တရီကျကေလေ့ တောင်စိုင်ရွီမရ စဉ်းစားနိန်ခယင့်။ တခါတလီ တေးခင်းချေတိ အသံဖဖွချေ ညည်းနိန်ခရေ။ ဒရင်းဘတ်မှာ မိုးအလင်းအိပ်ပါလားရေ ညည့်တိလေ့ဟိခရေ။ အေနိန့်ပြီးကေ နောက် ၃၊ ၄ နှစ်ကြာအောင်ထိ အေနေရာချေနန့် ဝီးနိန်ရဖို့ထော။
ဟို၊ ဒေ စဉ်းစားပလိုက်စွာ မိုးထ ၄ နာရီခွဲလို့ မေမေတောင် ဘုရားရှိခိုးဖို့ ထလာဗျာယ်။ “ယာ၊ သမီး၊ အေသူလေ တစ်ညည့်လုံး မအိပ်ထော၊ အဝီးကိုရောက်မှ နိန်မကောင်း ဖြစ်နိန်ဖို့သိ၊ လား လား၊ တနားချေဒါဖဲ့ လှဲပစ်ခီ။ ၆ နာရီလောက်ခါ မေမေနှိုးမယ်”
“မေမေ၊ တရားထိုင်ဖို့ လာစွာပါမနား၊ သင်းချို မအိပ်ချင်ပါ၊ မေမေနန့် တတူ တရားထိုင်ပါမေလေ။” ဆိုပနာ သားအမိနှစ်ယောက် ဓါတ်လယ် အသျှင်ဘုရား တရားခွေကိုဖွင့်လို့ တရားထိုင်ကတ်တေ။ သင်းချိုကတော့ တရားထိုင်နိန်ယင်း အပြင်ကို တချက်ရောက်လိုက်၊ ပြန်သိပီးလိုက်နန့် လည်နိန်တုန်းသိ။ ၁ နာရီ တရားထိုင်ပြီးကေ Breakfast စား၊ ရီမိုးချိုးလို့ လေဆိပ်ကိုဆင်းဖို့ လုပ်ကတ်တေ။ အားလုံး အဆင်သင့်ဖြစ်နိန်ကေ ဘုရားရှိခိုးရေ။ ပြီးကေ မေမေ၊ ပါပါကို ရှိခိုးရေ။ မေမေကတော့ ဆုတိ ကောင်းပီးနိန်ယင့်။ ပါပါက တစ်ခွန်းတည်းရာ ပြောရေ။
“စိတ်ပင်ပန်းမခံကဲ့၊ လာချင်ကေ အချိန်မရွီးပြန်ပါလတ်၊ ပါပါရို့ စောင့်နိန်ရေ။” ပြောပြီးကေ ထလားခရေ။
Taxi ထက်မှာ ပါပါက ရှိက၊ မေမေနန့် သင်းချိုက နောက်က။ မေမေ တစ်လမ်းလုံး တတွတ်တွတ်မှာရေ။ “ပေပေတေတေ မနိန်ကဲ့။ ကျန်းမာရေးကို ဂရုစိုက်၊ မမချေပိုင် သပ်သပ်ယပ်ယပ် ဆင်ပြင်လို့ချေနိန်၊ စာကြိုးစား၊ ညည့်မအိပ်ပဲ စာမဖတ်ကဲ့ကား၊ အားလုံးကို သတိဝီရိယနန့် အလှပချေနိန်၊ အစားအစာကို ပုံမှန်စားရဖို့၊ တစ်ခုခုဖြစ်ကေ အိမ်ကိုပြော၊ မိဘ အချိန်တိုင်း အသင့်ဟိနိန်ရေ၊ တစ်ယောက်တည်း ကြိတ်ပြီးကေ ခေါင်းမမာကဲ့၊ လူကိုသည်းခံ၊ လူတိုင်းကို နားလည်မှုပီးလိုက်။ သနားညှာတာရေစိတ်၊ ကိုယ်ချင်းစာစိတ်ကို ရင်ထဲမှာထည့်ထား၊ လူတိဆိုးကေ ဆိုးပတ်စီ၊ ကိုယ်မဆိုးစီကဲ့။ ဘုရား၊ တရားကို မမိကဲ့။ ကိုယ်တိုင်သိပြီးကေ လုပ်ရဖို့၊ ဇာကိုမဆို ဟူးဟူး ဒိုင်းဒိုင်း မဆုံးဖြတ်ကဲ့။ စိတ်မြန်စွာကို လျှော့. . .” ။
ပါပါက တစ်ခွန်းလေ့ မပြော၊ သက်ပြင်းတိကိုရာ ချပြီးကေ သင်းချိုကိုတောင် မကြည့်ဗျာယ်။ မေမေလေ့ ပြောရာပြောနိန်စွာ တစ်ခေါက်ချေတောင်မကြည့်။ သင်းချိုလေ့ တစ်ယောက်ကိုလေ့ မကြည့်ဘဲ မျက်လုံးအောက်နားကနိန် ဖိုင်ကိုထောင်လို့ ကာထားလိုက်တေ။
အေခြီလှမ်း၊ အေစိတ်ဆန္ဒတိအတွက် ဥပေက္ခာပြုထားရရေ အရာတိ များမှန်းမသိ များနိန်ယင့်။ လုပ်ချင်ရေ ဆန္ဒတစ်ခုတည်းကိုရာ သိပြီးကေ နွီးထွီးမှု၊ သံယောဇာဉ်ဆိုစွာကို ပပါးလလှပ်လို့ ထင်ခမိစွာ၊ အဂုမှ ဇာလောက် ခံရခက်လေ ကိုယ်တိုင်အသိဆုံး။ ယကေလေ့ အနောက်မှာ ဖေါင်ကိုဖျက်ပစ်ခဗျာယ်ဖြစ်လို့ ပြန်လှည့်ဖို့ အကြောင်းကမဟိဗျာယ်။
လေဆိပ်ကိုရောက်ကေ လုပ်စရာဟိစွာတိကို လုပ်ယင်းနန့် အချိန်ကုန် ယင်လိုက်တေပင်က။ လေယာဉ်ကိုဝင်ဖို့ အချက်ပီးနိန်ဗျာယ်။ နောက်ကို လှည့်မကြည့်၊ လက်တောင်မပြခ၊ ရှိကိုရာစူးစိုက်ပြီးကေ ထွက်လာခရေ။ မာန်တင်းထားရေကြားက သစ္စာဖေါက်ပနာ ခြီမကို စက်ခနန်းကျလာရေ ရီစက်တစ်ပေါက် သင်းချိုမျက်နှာကို နောက်လှည့်ခွင့်မပီး။ အကြိမ်ကြိမ် နောက်လှည့်ပနာ ပြီးပလိုက်တေ ခြီလှမ်းတိစွာ စိတ်ကူးတိရာဖြစ်နိန်ယင့်။ ပြန်လှည့်ပြီးချင်ရေစိတ်ကို အလိုလိုက်ဖို့ သတ္တိ လုံလုံလောက်လောက် မဟိခ။ သံယောဇာဉ်တိနန့် ချိုင်ထားရေ အေခြီထောက်တိ လီးလိုက်တေပင်က။ ယင်းခြီထောက်တိကို အဓမ္မသယ်(ဆွဲငင်)ယင်း လေယာဉ်ပျံထဲကို တစ်လှမ်းချင်း လှမ်းဝင်မိခရေ။ မိုက်မဲစွာကလွဲလို့ သတ္တိမဟိရေ သင်းချို လေယာဉ် ကောင်းကင်ကို ပျံအတက်ခါမှ နှလုံးသားပြုတ်ကျကျန်ခယင့်လေ…..
သင်းချို
